Mas'uliyatli ota-onalik" loyihasi haqida
Oilaviy munosabatlarni mustahkamlash va sog'lom avlodni tarbiyalashga qaratilgan keng qamrovli tashabbus.
Qisqacha ma'lumot
„Masʼuliyatli ota-onalik“ loyihasining asosiy maqsadi — yosh oilalarga masʼuliyatli ota-onalik mezonlarini oʻrgatish orqali sogʻlom va barkamol avlodni tarbiyalash tizimini takomillashtirish, oilaviy munosabatlarni barqarorlashtirish hamda milliy qadriyatlarga asoslangan farovon oilalarni shakllantirishga qaratilgan ilmiy, uslubiy va amaliy yondashuvlarni tatbiq etishdir.
Keng ma'lumot
Yangi Oʻzbekistonda oila institutini mustahkamlash, sogʻlom maʼnaviy-axloqiy, ijtimoiy-iqtisodiy jihatdan farovon va ibratli oilalarni shakllantirish, shuningdek, jismonan va ruhan sogʻlom farzandlarning dunyoga kelishi uchun qulay sharoitlar yaratish maqsadida keng koʻlamli islohotlar amalga oshirilmoqda.
Xususan, Oʻzbekiston Respublikasi Prezidentining 2022-yilda qabul qilingan PQ-216-son qarori sogʻlom farzand tugʻilishi, rivojlanishi va tarbiyasi boʻyicha tushuntirish ishlarini kuchaytirish, toʻgʻri ovqatlanish hamda jismoniy faollikni targʻib etish, sogʻlom turmush tarzi koʻnikmalarini shakllantirishni nazarda tutadi.
Shuningdek, 2025-yil 30-yanvardagi "Oʻzbekiston – 2030" strategiyasini "Atrof-muhitni asrash va "yashil iqtisodiyot" yilida amalga oshirishga oid Davlat dasturi toʻgʻrisidagi PF-16-son Farmoni bilan tasdiqlangan amaliy chora-tadbirlar rejasida "Ta'lim muassasalarida, mahallalarda, mehnat jamoalarida "Masʼuliyatli ota-onalik" loyihasini ishlab chiqish va tatbiq etish" vazifasi belgilandi.
Loyiha maqsadi
Yosh oilalarga masʼuliyatli ota-onalik mezonlarini oʻrgatish orqali sogʻlom va barkamol avlodni tarbiyalash tizimini takomillashtirish, oilaviy munosabatlarni barqarorlashtirish hamda milliy qadriyatlarga asoslangan farovon oilalarni shakllantirishga qaratilgan ilmiy, uslubiy va amaliy yondashuvlarni joriy etishdir.
Tahlillar
Tahlillar shuni koʻrsatmoqdagi, amalga oshirilayotgan islohotlar bilan birga, reproduktiv salomatlik xizmatlari sifatini oshirish, sogʻlom oilani shakllantirish va sogʻlom turmush tarzini targʻib qilish borasida tizimli muammolar saqlanib qolmoqda. Xususan:
- yoshlarni oilaviy hayotga tayyorlash,
- ota-onalik koʻnikmalarini shakllantirish dasturlariga boʻlgan ehtiyoj yuqoriligi,
- oiladagi nizolarni barvaqt aniqlash va ularni bartaraf etishda psixologik, huquqiy va tibbiy bilimlarning yetishmasligi,
- arzimas sabablar bilan oilalarning buzilib ketishining oldini olish bo‘yicha professional yondashuvlarning sustligi kabi muammolar mavjud.
Mazkur loyiha doirasida
Mazkur loyiha doirasida „Oila va gender“ ilmiy-tadqiqot instituti olimlari va mutaxassislari ishtirokida Masʼuliyatli ota-onalik mezonlari, ota-onalik taʼlim dasturlari va oiladagi ota-onaning asosiy masʼuliyatlari haqida „Masʼuliyatli ota-onalik“ oʻquv qoʻllanmasi tayyorlandi.
Bundan tashqari:
- ota-onalar masʼuliyatini oshirishga qaratilgan elektron targʻibot materiallari,
- masʼuliyatli ota-onalik mezonlari boʻyicha videodarslar,
- preventiv yondashuv asosida muammolarni ochib beruvchi podkastlar,
- audio/video rilslar va ijtimoiy roliklar ishlab chiqildi.
"Masʼuliyatli ota-onalik" veb-sayti va mobil ilovasi orqali
- videodarslar,
- oʻquv-uslubiy majmualar,
- uslubiy qoʻllanmalar,
- ijtimoiy roliklar joylashtirildi.
Shuningdek, elektron platforma orqali „Masʼuliyatli ota-onalik“ kursini muvaffaqiyatli tamomlagan oilalarga ijtimoiy sertifikat berish tizimi yoʻlga qoʻyildi.